訪問一 : 隊員喜愛的太鼓

December 28, 2018

上次就同大家介紹過唔同種類嘅太鼓，咁唔知我地嘅隊員又會鍾意邊種呢？不如今次就訪問一下佢地啦！

首先訪問下我地嘅女隊員先，Karmen就話佢最鍾意就係締太鼓，因為締太鼓嘅音色好聽之餘，打嘅野多數會比較複雜，對技巧上有追求，富有挑戰性。而且同時認為太鼓嘅演繹喺可以剛柔並重，力量同節奏嘅表達都可以有好多種唔同嘅演繹手法，就好似我地其中一首表演曲目「山嵐」咁，有動作同次序，令整個表演更有層次。

跟住就到昕昕啦，佢最鍾意嘅樂器喺締太鼓，因為締太鼓音色高而響亮，外形扁而細小，同時亦擔任樂曲中嘅領導者，同其他樂器合奏時，締太鼓嘅音色就會非常突出，既清晰又爽快。而締太鼓追求嘅技巧係要快，代表手腕要夠鬆，亦因音色高亢，配合快速嘅節奏能夠營造出強勁嘅氣氛於表演上。而昕昕亦傾向鍾意太鼓嘅演繹手法喺以花巧、配合動作為主，因為加上動作令外人覺得很豐富很澎湃，更加感覺有力量。

接住落黎就到Viki啦，佢嘅選擇就都同其他女隊員有啲唔同啦，佢最鍾意嘅樂器反而喺長胴太鼓太鼓。Viki話佢鍾意長胴太鼓嘅原因喺因為長胴太鼓嘅作用喺太鼓演奏上喺不可或缺嘅，音調未必最突出但平實，而且同時兼用到力量同動作技巧，角色雖然低調但亦有佢嘅重要性。而Viki鍾意太鼓嘅表達手法喺以力量去展現，因為佢鍾意太鼓可以運用到全身嘅力去擊打，就好似運動咁，當中嘅技巧都好關乎身體每一部分，當然節奏亦如是。

訪問完女隊員，不如就睇下我地嘅男隊員有咩睇法啦，首先緊喺訪問我地嘅Team Leader 弼哥(Hubert)啦！Hubert就話佢最鍾意嘅太鼓喺桶胴太鼓，因為桶胴太鼓可以掯住周圍走，能夠喺表演中拉近同觀眾之間嘅距離，而桶胴太鼓嘅兩面打法亦相當高難度，Hubert自己就好享受掌握到固中技巧後愈打愈順嘅感覺，雖然桶胴太鼓嘅外型並唔喺吸引到Hubert嘅地方，但佢好欣賞日本人對拉繩太鼓嘅方法，當中體驗出日本人對每件事嘅仔細。而對於太鼓嘅演繹方法上，Hubert就鍾意以力量表達多啲，因為相比其他樂器，太鼓能夠比到「勁」個種感覺去感染觀眾，雖然配合舞蹈演繹自己亦好喜歡，但始終唔喺自己精通嘅範疇。

到訪問到第二位男仔啦，我地又不如睇下BGD人氣王傑仔鍾意邊種太鼓啦！佢鍾意嘅太鼓亦好切合佢嘅性格，同大部分隊員唔一樣，佢鍾意嘅太鼓反而喺平桶太鼓。傑仔鍾意平桶太鼓嘅原因喺因為平太鼓嘅外型岩岩好，唔太大唔太細，而音色亦最能夠代表到鼓個種震憾感，打嘅方式亦都好大眾化，比較容易上手。而比較邊一種演繹方式自己較為喜歡，傑仔就表示自己幾種都鐘意.，因為太鼓表演要多啲唔同嘅元素先唔會悶。